Kjallari
Stór kjallari er undir húsum og inngarði. Hann er að mestu á tveimur hæðum fyrir utan lítinn hluta á þremur hæðum. Þar verða sameiginlegar geymslur, sérgeymslur íbúða, inntaksrými og bílastæði.
Bílakjallari
Í bílakjallara eru 183 bílastæði sem eru til útleigu til lengri eða skemmri tíma, en einnig er hægt að greiða fyrir stæði eftir tímamæli innan dagsins. Inn- og útkeyrsla er frá einum stað frá Skeifunni.
Út frá staðsetningunni er ekki sjálfgefið að kaupendur íbúða að Grensásvegi 1 eigi bíl til daglegra nota. Þar með er ekki sjálfgefið að þeir vilji greiða fyrir þann kostnað sem fylgir því að eiga og reka bílastæði.
Sökum þessa eru mánaðarleg húsfélagsgjöld íbúða lág, þar sem þau innihalda ekki rekstrarkostnað bílastæða á lóðinni. Í því ljósi er hvortveggja að finna þjónustu fyrir bíl-lausan lífstíl og auðvitað þann vinsælli lífstíl þar fólk kýs að eiga sinn bíl.
Fyrir þá sem kjósa að eiga ekki bíl er boðið upp á deilibílaþjónustu í samstarfi við Flandur í eigu Brimborgar. Íbúar geta tekið sendi- og fólksbíla á leigu í eina klukkustund eða fleiri upp í nokkra daga. Einfaldur leigumáti í gegnum Flandur appið. Smá skráning fyrir fyrstu leigu en eftir það enn einfaldara. Klárlega þjónusta sem mun aukast á næstu árum og áratugum.
Fyrir þá sem eiga sinn bíl, þá er boðið upp á þann möguleika að leigja stæði með mánaðarlegu gjald, án skuldbindingar um frekari leigu. Engin rekstrarleg tenging er á milli húsfélags íbúðanna og rekstur bílakjallara á Grensásvegi 1. Ef tekið er saman leigugjaldið fyrir eitt stæði á mánuði og húsfélagsgjald íbúðar þá er heildar upphæðin í takt við það sem fólk greiðir almennt í fjöleignarhúsum hvern mánuð til síns húsfélags sem rekur sinn eigin bílakjallara, en á Grensásvegi 1 er þessu skipt upp í sitthvora greiðsluna. Allar greiðslugáttir fyrir bílastæði í boði frá Parka bílastæðaþjónustu.
Samhliða lagningu í bílakjallara er mögulegt að hlaða rafmagnsbílinn með hraðhleðslu eða bara með hinni týpísku hverfastöð sem tekur aðeins lengri tíma. Hvortveggja rekið og þjónustað af ON allan sólarhringinn.
Allir þessir valmöguleikar sem nefndir hafa verið gera bílakjallarann á Grensásvegi 1 fyrir íbúðabyggð einn þann tæknilegasta og þjónustudrifna á Íslandi og þó að víðar væri leitað.
Deilibílar Flandurs
Deilibílar Flandurs eru nútímalegur valmöguleiki fyrir íbúa og atvinnurekendur á Grensásvegi 1. Flandur hefur tekið í notkun nýja lausn á íslenskum húsnæðismarkaði þar sem deilibílar verða hluti af daglegri þjónustu við íbúa.
Í samstarfi við Fasteignafélagið G1 hafa deilibílar Flandurs verið staðsettir í sérmerktum bílastæðum í bílakjallara nýrra íbúða og atvinnurýma við Grensásveg 1. Með því fá íbúar aðgang að bæði fólksbílum og sendibílum þegar þörf krefur, án tilheyrandi skuldbindinga.
„Við erum að færa deilibílinn þangað sem hann nýtist virkilega vel, beint inn í húsnæði á svæði þar sem margir kjósa að eiga ekki bíl,“ segir Anton Smári Rúnarsson, framkvæmdastjóri Flandurs. „Þegar fólk þarf bíl tímabundið, hvort sem um er að ræða stutt erindi eða stærri verkefni, er nú einfalt að bóka bíl og sækja hann strax. Deilibílar verða þannig hluti af nýtískulegu og vistvænu búsetuumhverfi við Grensásveg 1, þar sem þjónusta og sveigjanleiki eru í forgrunni.“
Þjónustan er hönnuð með raunverulegar aðstæður í daglegu lífi í huga. Íbúar geta valið á milli fólksbíla og sendibíla, eftir því hvort þörf er á að skjótast á milli staða eða vegna stærri innkaupa eða flutninga.
Bókun fer fram á einfaldan hátt í gegnum Flandur appið og hægt er að leigja bíl frá einni klukkustund og allt upp í heilan mánuð, allan sólarhringinn. 100% Rafbílar og hleðsla innifalin.
Bílaflotinn er alfarið rafknúinn og er rafmagn innifalið í sérmerktum bílastæðum í húsinu, þannig að hægt er að hlaða bílana frítt á staðnum.
„Við viljum að upplifun kaupenda og íbúa á Grensásvegi 1 sé meira en fermetrar, hún á að vera þjónusta sem einfaldar lífið í takt við aðra þjónustu allt um kring í Skeifunni, Ármúla og Glæsibæ.“ segir Stefán Á. Magnússon, framkvæmdastjóri Fasteignafélagsins G1.
„Með deilibílum í bílakjallaranum fá íbúar aðgang að bæði fólksbíl og sendibíl eftir þörfum það eykur valfrelsi og styrkir búsetugæði án þess að íbúar þurfi að reka sinn eigin bíl með tilheyrandi föstum kostnaði. Með tilkomu deilibíla Flandurs klárum við að uppfylla alla þjónustuþætti bílakjallarans sem við lofuðum kaupendum fyrir sölu á fyrstu íbúð, sem er aðgengi að deilibílum, aðgengi að leigustæðum og aðgengi að bæði hverfa- og hraðhleðslu. Allt er þetta þjónusta og þar með kostnaður sem fólk getur valið um, en slíkt val er lífsgæði sem vonandi aðrir byggingaraðilar taka upp á næstu árum og áratugum.“
Geymslur
Í kjallara eru allar séreignageymslur íbúða. Einnig er þar að finna sameiginlega sorpgeymslu og um 300 fermetra hjólageymslu sem verður aðgengileg fyrir íbúa og starfsmenn atvinnuhúsnæðis.
Hjólanotkun er að aukast mikið ár frá ári og verður slíkur ferðamáti sífellt raunhæfari og vinsælli valkostur sem samgöngumáti fyrir fólk sem býr miðsvæðis á Stór-Reykjavíkursvæðinu þar sem láglendi er meira en upp í hlíðum úthverfa.
Sorpflokkun er öll inni í sameiginlegri sorpgeymslu í gegnum lúgur á veggjunum, sem gerir aðgengi það sama hvort sem um vetur eða sumar er að ræða. Engin sorpgeymsla eða flokkun er utandyra á lóð.